Hlaðborð: Dygðir og græn orka

Nokkuð hefur verið fjallað um siðferði Íslendingasagna en minna um dygðir í einstökum sögum. Hér verður gerð grein fyrir rannsókn á dygðum í Laxdæla sögu og Gísla sögu. Sagt verður frá þeim dygðum sem finna má í sögunum en áhersla verður lögð á þann mun sem sjá má á sögunum hvað þetta varðar.

Rannsóknin sem hér um ræðir er gerð í því augnamiði að búa til námsefni um dygðakennslu með Íslendingasögum og styðja við slíka kennslu. Með það að leiðarljósi er markmiðið frekar að túlka sögurnar út frá nútímalegum skilgreiningum á dygðum en að skilja nákvæmlega þau viðhorf sem ætla má að höfundar sagnanna hafi haft.

Orkumálin hafa óvenju mikið verið í sviðsljósinu á Íslandi undanfarnar vikur og mánuði, eftir töluvert langt hlé. Að hluta til er þessi aukna umræða vegna uppvakningar á ýmsum eldri virkjanahugmyndum sem enn eru á sveimi, þrátt fyrir að búið sé að fjalla um þær í Rammaáætlun. Önnur umræðuefni hverfast í kringum loftslagsmál með einum eða öðrum hætti, ekki þá síst um meinta nývirkjanaþörf vegna fyrirhugaðra orkuskipta hérlendis. Mikið er horft á vindmyllugarða í því sambandi, en fyrir liggja hugmyndir um að reisa hátt í 40 slík orkuver, staðsett víðsvegar um landið. Samhliða því hefur verið rætt um að vindorkuver eigi að fá sérmeðferð í Rammaáætlun þar sem þau nýta orku sem er að fullu endurnýjanleg og til þess að gera óþrjótandi. Í erindinu verður rýnt í orðræðu ólíkra aðila sem takast á um hugi og hjörtu landsmanna í loftslagsmálum um þessar mundir.